خالد موسى السيد / 5 دقائق

خالد موسى شاعر العامية
‏٥‏ دقائق
في موتي سكة لحياتك
مبتدئ
لإن حلمك الواهي الضعيف
كان كفيف
مكنش عمره ف يوم عفيف
أو نضيف
وبيعشق الجو المخيف
1
وأنا كنت عارف
وإنت عارفه
لما شفتك جوه باحة ذكريات
جوه واحة بتبتدي بعمري اللي فات
جوه جدران الأمل اللي بيبنيها الموات
كنت عارف وانت عارفه
ان مشاعرنا الحزينه
اتكتب ليها السكات
انا كنت عارف
إننا
مش مكتوبين
في العمر ثانيه لبعضنا
لا أنت ليه
ولا عمري هبقا
ف لحظه ليكي
وبرغم إن الشوق ماليكي
وبرغم طوق الرغبه
اللي كان جوه احلامك طاويكي
وبرغم كل الخوف عليكي
وبرغم قلبي اللي إنفطر
لجل يداويكي
لا كنت ليه
ولا هبقا يوم في العمر ليكي
أنت دنيا وحاله تانيه
والجنون جوه أحضانك أويكي
والضباب وياه سراب
جوه ف أحلامك عاميكي
وبعمر تاني بتحلمي
إنه يناديكي
****
كنتي الغريق
اللي بيرميه الطريق
في سكة العوام
وسط بحر الخوف لقيتك
بتشتهي لحظة سلام
نفسك في خطوه للأمام
نفسك في إيد تتمدلك
ولجو تاني يأهلك
وينولك
لحظة أمان
حيرانه وسط الحيرانين
مليانه بالحزن الدفين
متهانه من ذل السنين
وزي كل المنهوشين
خايفه من غدر الزمان
وشوفي سخرية القدر
لما القدر يكتب دموع
جوه في عنيكي الحزينه
وألاقيها نازله من عيونك
فوق خدودي المستكينة
لما الوجع يسري ف كياني
لما انت تقولي آه
لما روحي ويا روحك
يرسموا شكل الحياه
لما يبقا الوعد بينا
ان نبقا لبعض دايما
لو ف يوم القرب تاه
****
تبقى أول إهتمامي
وأبقا أول اهتمامك
لو في يوم البعد خاني
أو في يوم البعد خانك
أبقا عارف مهما كنت
إني بيكي وأنت بيه
مكنتش اعرف يا حبيتي
إن أحلامنا اللي هيه
كات قويه
كات عفيه
تيجي لحظه وتنصهر
تصبح عاديه
أن فيها يوم هيجي
تتمردي بسعدك عليه
تمحي أيامي اللي راحت
وتهيني أيامنا اللي جايه
تقطعي وصلي وايديه
وتكتبي وبخط واضح
أني لازم ابقا ميت
لجل بالحلم الهزيل
تقدري انك تعيشي
خالد موسى السيد