دياب محمود حسن / وظيفة خالية

وظيفة خالية
*********
الفساد عمْ وساد
...غطى وزاد
......ملى البلاد
الطريق اللى لسه
امبارح مسلمينه
اتشقق واتكسر
وهما لسه مسفلتينه
والوظيفة النضيفة
لليدفع
إعلان وظيفة فى الجرايد
ملايين تقدم وروحها تطلع
والنتيجة شعب قاعد ع الحديدة
بعد ما كان فيه أمل يلاقى عمل
يقوم ياخدها اللي عنده ناس
حبايبه
خمسة ستة والباقى يرجع
النتيجة مش جديدة كلنا عارفين
رايحين لمين وبرده نستعبط
ونروح نقدم الورق اللي من
الركنة اتحرق
يا شعب طيبة
يللى كل يوم تنام وتصحى ع
المصيبة
كفاية طيبة
قوم ودور شوف حقوقك مين
واكلها
والمصيبة مين عاملها وحدك انت
اللي شايلها
الفساد شغال طاحونة ناس بتغنى
تفتح الأدراج وتعلى
وانت حارقينك بولعة
ناس بتملى من بلدنا وبعد ثانية تكب
برة
وهى مرة بعد مرة يملى جيبه حسابه
يكبر يطير لبرة
شعب صورة طول عمره غيره ياكل
وهو يدفع الفاتورة
اللي طلعوا معاه فاتونا
واللي كانوا ورا سبقونا
واللي كانوا بياكلوا من عندنا بيأكلونا
من سنين بيذلوا فينا
علمناهم سبقونا وجرحونا قالوا انتم
شعب جاهل رحلونا
اتعلموا وزحلقونا بالصابونة
يا بلادى عيشى حرة وبطلى
شغل الطابونة
ابعدى اللي ضيعونا
دمروكى وشحتونا
اسعى دايماً للعدالة
فتشى فى كوم الزبالة
عن ورق النابغين
ويبقوا هما الناجحين
ومش مهم هما مين
المهم بلدنا تعلى لما
اشوف الكرسي يخلى
وتانى يوم اشوف عليه
صادق أمين

كلمات أ / دياب محمود حسن