فائز اهل / دوامة الدنيا

دوامة الدنيا

وتمضي بنا الأيام
بدوامة الدنيا؛ عايشين ومش داريين..
..
دنيا كما البندول
ساعة تاخدنا شمال؛ وساعة تاخدنا يمين..
..
عيشة أهي وخلاص
بتضيع بها الأعمار ؛ وبنقضي فيها سنين..
..
السعد تاه فيها
البعض يا دوب عايش؛ والباقي كله حزين..
..
نجري ورا اللقمة
ولا نلحق الهدمة؛ كلنا عايشين عيشة المساكين..
..
ياما؛ ياما جمعنا الفرح
بزمن راح وخلاص؛ وتحولت الأفراح فقر وألم وأنين..
..
السعد راح منا
فقدنا عزتنا والفقر جوعنا؛ والحق كان على مين؟..
..
إحنا بإيدينا
ضيعنا فرحتنا؛ ضيعنا عزتنا؛ تملي متخاصمين..
..
لو تصفى نيتنا
وقلوبنا نبيضها؛ حتعود بسمتنا؛ وتحسنا عايشين..
..
يا ناس فوقوا
خلاص؛ صحوا بقى الإحساس؛ يكفى ضنى وأنين..
..
طيب ليه منتعاهد
نرجع كما كنا؛ الصدق شيمتنا وعلى الحب مجتمعين..
..
حنرجع كما كنا الحب يجمعنا
نلقى عزتنا والخير يغمرنا؛ ونبقى صحيح عايشين..

فايز أهل
١-١١-٢٠١٩