مدحت ثروت / بحبك

بحبك.            ( خاطرة شعرية)
الأديب والشاعر المصري مدحت ثروت
بحبك كلمة ما بتأذيش
بحبك كلمة طيبة مش نفخ ريش
على اد ما هي طيبة
أذيتها في سنين لو ضاعت في الهيش
يطلع الحب جرح
أو وهم صعب ما يتحكيش
بحبك قلب روحه فيك
وقلبك من غيره ما يقدر يعيش
بحبك خوف واهتمام.. واحترام
دة مش جرسون مستني بقشيش
بحبك لو تسمعيها الروح بتسعد
ولو حسيتها بعد الموت تقدر تعيش
بحبك مش شرط كلمة
بحبك موقف، همسة، نظرة عين متتحكيش
وتحكي الف حكاية
كل لحظة فرحة القلب ما تمشيش
بحبك يقولها القلب الف مرة
و تقولها الشفايف ما تختشيش
بحبك حروفها نور
يحسها المحروم وابو قلب اتألم ونبضه مفيش
وبحبك حسيتها، دوقيها
طعم في الكلمة ما تخافيش
دوقي كلامي هتحسي هيامي
ولمعة عيني وقت اللقاء ما تتنسيش
بحبك كلمة طيبة
ام حنينة حنانها بيضمك متلوميش
بينك وبين هوايا بلاد
أو سفر او خطوة صعبة ما تتمشيش
هيعدي قلبي اشواك طريقي
ويتحدى موج بحره ما رحمنيش
لكن هفضل بحبك
قلتها او ما قلتش وانتي برضه ما قلتيش
بحبك ايوة بحبك
ونبض حبي خلى قلبي ما يسيبنيش
بحبك حضن دافي
يدفي خوفك ويطمن حزنك ما تحزنيش
انا جواكي حلم وردي
وانتي نغمة لحن نوره ما ينطفيش
ايد تطبطب على وجعك
وصدر قلبك يقوله غيرك مليش
#مدحت_ثروت